Kammeraod Zaitsjef, ambtenaer beej 't staats-inkoupberoo haet ein klein probleem. Met hert en zeel haet hae gevochte um ein kinderkresj te kinne äöpene. Hae haet alles klaor. Hóndervièftig kapstökskes, hónderdvièftig steulkes en hóndervièftig kinderbedjes. Echter de kinderbedjes zeen d'r neet moeëj oèt en hebbe dringend ein verfbeurt nuuëdig.
Hae mót dus verf koupe en waal erg rap, want euver twieë waeke mót de kresj aop. Um vièftig kilo verf te kinne koupe, haet hae de handtekening nuuëdig van kammeraod Mjoessof, dae in röshoès 'De Zónnebloom' verblièf. Hae krieg echter van de dame van de hoèshalding gen toestumming um Mjoessof te store tièdens zienen rösdaag. Um zien doel te bereike guf hae zich oèt veur d'n man van de bereumde landbouwstudente Klawa Iwanow.
Dees haet echter ein óntmoeting met euren man gearrangeerd, door umstendighaeje hebbe ze mekaar erg lang neet gezeen. Ièrdet dees twieë mekaar vinde speult zich ein reeks komische persoeënsverwisselinge aaf. As oètintelik Mjoessof zien handteikening wil zette, blièk d'r nörges ein pen de vinde te zien.